Актерката Хале Бери на годинашниот филмски фестивал во Кан пленеше со модните комбинации, а последниот ден од фестивалот не беше исклучок.
На завршната церемонија, Хале се појави во долг бел чипкан фустан кој делумно беше проѕирен. Со тенок ремен со панделка ја нагласи својот тенок струк.
Ова е изгледот на Хале Бери на фестивалот во Кан:
Претходно, актерката изјави дека поради новите правила на фестивалот била принудена да ги смени своите модни комбинации. „Имав прекрасен фустан од Гупта, но не можев да го носам затоа што имаше предолг шлеф. Мораше да го сменам. Но, делот со голотијата веројатно е добро правило“, рече таа на прес-конференција.
Какви се сега правилата за облекување во Кан?
Поради различни модни изданија во претходните години, филмскиот фестивал во Кан воведе нов дрес код за црвениот тепих пред самиот почеток на настанот. За да се обезбеди пристојност, организаторите најпрвин забранија т.н. „голи фустани“.
„Голотијата е забранета на црвениот тепих, како и на другите простори каде се одржува фестивалот“, стои во официјалната одлука. Исто така, беше истакнато дека пристапот до фестивалот ќе биде забранет за сите кои нема да ги почитуваат овие правила.
Понатаму, донесени се и дополнителни правила. Забрането е носење „волуменозни фустани или фустани со шлеф“, како и доаѓање во „голи фустани“ за да се „обезбеди поголема пристојност“. Сепак, многумина ги прекршија овие правила.
