Пожар од поголеми размери избувна попладнево над скопското село Бојане, при што огнот зафаќа околна вегетација.
Според првичните информации, пожарот се шири во реонот поврзан со правецот кон општина Јегуновце, а надлежните служби се обидуваат што побрзо да го стават под контрола и да спречат негово приближување кон населените места.
На терен се мобилизирани значителни противпожарни сили. Во интервенцијата учествуваат четири екипи на Противпожарната бригада на Град Скопје, а како засилување пристигнале и пожарникари од Тетово.
На местото е и директорот на Центарот за управување со кризи, Мухамед Али, кој информира дека директно од терен се координираат активностите и потребните капацитети за локализирање и гаснење на пожарот.
Од ЦУК посочуваат дека се во постојана комуникација со сите институции и служби вклучени во интервенцијата.
Екипите продолжуваат со борбата против огнот, а главната цел е пожарот што побрзо да биде локализиран и да се спречи негово понатамошно ширење.
