Едно дете на возраст од околу година и пол почина, а уште четири деца се хоспитализирани откако престојувале во иста приватна градинка во Тропеа, во јужна Италија. Здравствените власти истражуваат дали случаите се поврзани со бактериска инфекција.
Според локалните медиуми, детето од местото Зунги, во регионот Калабрија, било примено во болница на 17 јули. Поради нагло влошување на здравствената состојба, било префрлено со хеликоптер во педијатриската болница „Бамбино Џезу“ во Рим, каде што подоцна починало.
Во меѓувреме, уште четири деца кои ја посетувале истата градинка развиле слични симптоми и се задржани на болничко лекување.
Иако официјалната причина за смртта сè уште не е потврдена, според првичните информации постојат сомневања дека станува збор за бактерија која може да предизвика менингитис. Надлежните здравствени служби веднаш започнале истрага и земале примероци од градинката за лабораториски анализи, со цел да се утврди евентуалниот извор на инфекцијата и да се спречи нејзино понатамошно ширење.
До објавувањето на резултатите од анализите, градинката е привремено затворена, а здравствените власти апелираат да не се шпекулира со причините за случајот сè додека не заврши официјалната истрага.
