Едно лице го загуби животот, а друго е повредено по уривање на кран на градилиште во Болничкиот округ во Приштина, соопшти косовската полиција.
Првичните информации укажуваа дека во несреќата биле повредени две лица, но едното од нив подоцна им подлегнало на повредите.
Портпаролот на полицијата за регионот на Приштина, Енис Пљана, изјави дека повредените веднаш биле пренесени на лекарска помош, но медицинскиот тим во Универзитетскиот клинички центар констатирал смрт кај едно од лицата.
По пријавата, полициски екипи излегле на местото на несреќата и започнале увид. Во координација со надлежниот државен обвинител е отворена истрага за целосно утврдување на околностите под кои дошло до уривањето на кранот.
Засега не се соопштени дополнителни информации за причините за несреќата, а истрагата е во тек.
