Министерството за внатрешни работи во изминатото деноноќие регистрирало вкупно 10 пријави за семејно насилство на повеќе локации низ државата, додека пет лица биле лишени од слобода, а со едно лице бил извршен службен разговор.
Според информациите од МВР, најголем дел од случаите се однесуваат на физичко насилство, закани и психичко вознемирување меѓу членови на семејството или поранешни партнери.
Во Скопје бил приведен 46-годишен маж поради физички напад врз сопругата, додека во други случаи жени пријавиле насилство од поранешни сопрузи, вонбрачни партнери и блиски роднини.
Приведувања имало и во Кочани, Штип, Делчево, Велес и Крива Паланка. Во неколку од пријавите, жртвите навеле дека подолг временски период биле изложени на физичко и психичко малтретирање. Во Делчево, кај еден од осомничените било утврдено присуство на 1,79 промили алкохол во крвта.
Еден од посложените случаи е регистриран во Велес, каде поради меѓусебни обвинувања за семејно насилство во постапката биле вклучени и јавен обвинител и Центарот за социјални работи.
Од Министерството за внатрешни работи информираат дека се преземаат сите неопходни мерки за целосно расчистување на случаите, по што против осомничените ќе бидат поднесени соодветни пријави.
