Трагично заврши четиридневната потрага по осумгодишното дете кое исчезна во реката Драва во Хрватска. Спасувачките екипи денеска го пронајдоа неговото тело на околу два километри од местото каде што последен пат било видено.
Според информациите од хрватската полиција, телото било пронајдено во попладневните часови во близина на Селница Подравска, во општина Леград.
Во потрагата изминатите денови учествуваа полициски службеници, припадници на Хрватската планинска служба за спасување (ХГСС), нуркачи, пожарникари, како и голем број локални жители. Во акцијата беа вклучени и екипи од соседните окрузи Вараждин и Меѓимурје.
По наредба на надлежното обвинителство, започнати се истражни дејствија со цел да се утврдат сите околности под кои дошло до трагедијата.
Според градоначалникот на Леград, Иван Саболиќ, детето исчезнало во дел од реката Драва кој не е официјално капалиште. Неофицијалните информации наведуваат дека тоа било заедно со својот брат, а во еден момент влегло во водата и исчезнало.
Трагедијата ја потресе локалната заедница, која со денови се надеваше на среќен исход. Надлежните апелираат до граѓаните да бидат особено внимателни при престој покрај реки и езера, особено на места кои не се предвидени за капење.
