Полицијата во изминатите 24 часа привела 16 возачи низ државата поради сериозни прекршоци во сообраќајот. Најголем дел од нив биле затекнати зад волан без возачка дозвола, додека неколкумина управувале возила под дејство на алкохол.
Според информациите од МВР, дури 11 лица возеле без воопшто да поседуваат возачка дозвола. Меѓу нив има возачи од Скопје, Куманово, Гостивар, Кочани, Кривогаштани и други места низ државата. Дел од приведените управувале и мопеди без соодветна дозвола.
Четворица возачи биле откриени дека возат под дејство на алкохол. Најкритичен бил случајот во Прилеп, каде кај еден возач биле измерени дури 2,45 промили алкохол во крвта. Дополнително, било утврдено дека имал и активна забрана за управување со моторно возило.
Во Општина Дебарца, алкохолизиран возач со 1,99 промили алкохол предизвикал сообраќајна незгода откако изгубил контрола и удрил во бетонска жардињера. Во Кавадарци, пак, мотоциклист бил фатен со 2,03 промили алкохол, додека кај возач на мопед од Кочани биле измерени 1,88 промили.
Од МВР најавуваат дека против сите 16 лица ќе бидат поднесени соодветни кривични пријави по целосното документирање на случаите.
Полицијата повторно апелира до граѓаните да не седнуваат зад волан без возачка дозвола, под дејство на алкохол или доколку имаат изречена забрана за управување, со цел да се зголеми безбедноста на патиштата.
