Во Хрватска излезе во јавноста еден од најшокантните случаи во последните години, поврзан со смрт на две бебиња чии тела биле пронајдени закопани во дворот на семејна куќа во местото Љубељ Калнички, во близина на Нови Мароф.
Според судските информации, родителите на децата се осудени на по 17 години затвор, откако судот утврдил дека со нивното сериозно занемарување придонеле за смртта на две од нивните три деца.
Телата на двете бебиња биле откриени во есента 2024 година, закопани во дворот на семејната куќа. Третото дете, кое во тој момент било живо и имало околу четири години, веднаш било згрижено од социјалните служби.
Во текот на постапката било откриено и дека парот во меѓувреме добил уште едно дете, кое веднаш по раѓањето било одземено од надлежните служби додека мајката била во притвор.
Судот објаснил дека не станува збор за директно убиство, туку за тешко занемарување на децата, кое резултирало со смрт. За ова дело законски се предвидени казни од неколку до 15 години затвор, но по спојување на повеќе дела, казната е зголемена на 17 години.
По откривањето на случајот, на родителите им биле одземени и другите деца, а истрагата покажала дека семејството живеело повлечено и изолирано од околината.
Според сведоштва од локални жители, таткото имал ексцентрично однесување и бил поврзуван со религиозни групи со крајно конзервативни ставови, каде што, наводно, смртта на децата ја толкувал како „божја волја“.
Истрагата и натаму се води за да се утврдат сите околности што довеле до трагедијата, додека случајот предизвика силни реакции во јавноста во целиот регион.
