Полицијата во Сокобања уапсила 45-годишен маж од Белград, кој е осомничен дека предизвикал тешка сообраќајна несреќа, а потоа избегал од местото без да ѝ укаже помош на повредената.
Според соопштението на српското Министерство за внатрешни работи, осомничениот на 23 јули, управувајќи автомобил „Рено“ во околината на Сокобања, удрил 66-годишна жена која се движела по коловозот, по што го напуштил местото на несреќата.
Повредената била итно пренесена во Клиничкиот центар во Ниш, каде што лекарите констатирале тешки телесни повреди.
По оперативна работа, полицијата го идентификувала и привела осомничениот, против кого се води постапка поради сомнение за тешки дела против безбедноста на јавниот сообраќај и неукажување помош на лице повредено во сообраќајна несреќа.
По налог на Основното јавно обвинителство во Алексинац, на осомничениот му е одредена мерка задржување до 48 часа, по што со кривична пријава ќе биде изведен пред надлежниот обвинител.
