Повеќе од 700.000 евра наменети за исплата на пензии и социјална помош се во центарот на истрагата за финансиски злоупотреби во филијала на Албанската пошта во Драч. Станува збор за околу 69 милиони албански леки, а меѓу клучните докази во истрагата се и снимките од безбедносните камери на кои се гледа движење на вреќи и пакети со пари.
Во случајот се опфатени три поранешни службенички – поранешната директорка на филијалата Елизабета Матај, поранешната раководителка на финансии Валбона Дуни и благајничката Паола Дана.
Матај повеќе од два месеца се наоѓала во притвор, но Судот во Драч неодамна ја променил мерката за обезбедување и ја префрлил во домашен притвор.
Случајот бил откриен во јули, кога албанската полиција соопштила дека 69 милиони леки, кои требало да бидат испратени до поштенските филијали во Шијак и Круја за исплата на пензии и социјална помош, не биле евидентирани во касите на тие филијали.
Трите службенички биле уапсени во рамките на полициската операција „Филијала“.
Според истражното досие објавено во албанските медиуми, истрагата утврдила низа сомнителни трансакции во текот на април и мај годинава. Во документацијата било наведено дека средствата биле испратени од Драч кон филијалите во Шијак и Круја, но при контролата било утврдено дека парите не пристигнале таму.
Особено значајни за истрагата се снимките од безбедносните камери во поштата. Според истражното досие, на повеќе снимки се гледа како вреќи или пакети со пари се земаат од касата и се носат во канцелариите на лица од раководството.
Во еден од документираните случаи, вреќа со пари која претходно била донесена со обезбедување од банка била однесена во канцеларијата на тогашната директорка Матај.
Во друг случај, од 21 мај, на снимките, според досието, се гледа како пакет со банкноти бил внесен во канцеларијата на Матај. Службеничката која го донела пакетот потоа ја напуштила канцеларијата без него.
Истражителите ги споредувале видео-снимките со платните налози и останатата финансиска документација во обид да утврдат како се движеле средствата и каде исчезнале.
На рочиштето одржано во јули, тогашната раководителка на финансии Дуни изјавила дека парите ги преземала директорката во нејзината канцеларија.
Матај, пак, на прашањето на судот каде завршиле 69-те милиони леки одговорила дека не знае.
Станува збор за искази дадени во рамки на истражната постапка и тие сами по себе не претставуваат правосилно утврдени факти.
На почетокот Судот ја оставил Матај во притвор, додека за Дуни и Дана била определена мерка домашен притвор. Со последната одлука, и мерката за поранешната директорка била ублажена во домашен притвор.
Истрагата продолжува, а надлежните треба да утврдат каде завршиле парите наменети за пензии и социјална помош, на кој начин биле изнесени од предвидениот тек и дали во целата шема биле вклучени и други лица.
