Возачите кои оваа година ќе патуваат кон грчките летувалишта преку Солун треба да бидат подготвени за повремени измени во режимот на сообраќајот. Големиот инфраструктурен проект за изградба на нов надвозник ќе продолжи и во текот на 2026 година, поради што на одредени делови од обиколницата околу Солун (Перифериаки) повремено ќе има ноќни или викенд-затворања и пренасочување на сообраќајот.
Иако најголемиот дел од времето сообраќајот се одвива без значителни проблеми, грчките власти повремено затвораат поединечни делници за да се изведуваат градежните работи, а возилата се пренасочуваат по алтернативни маршрути.
Обиколницата околу Солун е главната транзитна рута за голем број туристи кои патуваат кон Халкидики и летувалиштата во близина на Солун, па секоја промена во режимот на сообраќајот предизвикува големо внимание кај патниците.
Преку оваа обиколница најлесно се пристигнува до сите туристички места на Касандра, Ситонија и централниот дел на Халкидики, како што се Неа Флогита, Неа Каликратија и Плажа Дионисиу, како и до Переа, Агиа Триада и Неи Епиватес, кои се наоѓаат во непосредна близина на Солун.
Од друга страна, за повеќе туристички дестинации воопшто не е потребно да се минува низ обиколницата. Доколку патувате кон Кавала, Тасос или полуостровот Атос, најпрактично е да се користи автопатот Егнација Одос (А2), без влегување во Солун.
Исто така, патниците кои се упатуваат кон Лефкада, Парга, Сивота, Крф или Кефалонија можат да ја користат западната траса преку Јанина и Игуменица, односно преку Патра и пристаништето Килини, без потреба да минуваат низ Солун.
За туристите кои летуваат во Олимпискиот регион – Паралија, Олимпик Бич, Лептокарија, Платамон, Неи Пори и Литохоро – најбрза опција останува автопатот А1 кон Атина, без користење на обиколницата околу Солун.
За патниците кои во Грција влегуваат преку граничниот премин Дојран, препораките се малку поинакви. Доколку патуваат кон Халкидики или кон Переа, Агиа Триада и Неи Епиватес, најдобро е да се користи источниот дел од обиколницата, со што се избегнува западниот дел каде што најчесто се создаваат поголеми гужви.
За Кавала, Тасос и Атос, патувањето најчесто продолжува преку Аспровалта без потреба од користење на обиколницата околу Солун.
Од друга страна, доколку крајната дестинација се Олимпискиот регион, Лефкада, Парга, Сивота, Крф или Кефалонија, навигацијата најчесто ќе ве насочи кон автопатот А1 преку Солун, иако во многу случаи влезот преку Евзони останува побрза и попрактична опција.
На возачите им се препорачува внимателно да го планираат времето на минување низ Солун. Најголеми гужви најчесто има во утринските часови од 7:00 до 10:30 часот, како и попладне помеѓу 15:00 и 19:00 часот.
Во саботите, особено по 10:00 часот, може да се очекува зголемен сообраќај во правец кон Халкидики, бидејќи голем број жители на Солун тогаш заминуваат на викенд покрај море. Затоа, доколку патувате во сабота, препорачливо е да пристигнете во Солун во раните утрински часови.
Според досегашното искуство, и покрај интензивните работи, во текот на јули и август не се забележани поголеми застои предизвикани од изградбата. Напротив, во август сообраќајот во самиот Солун често е помал бидејќи многу жители се на годишен одмор.
Доколку дојде до привремено затворање на дел од обиколницата, возачите можат да ги користат алтернативните правци низ градот. Како добра опција останува движењето низ индустриската зона и центарот на Солун, преку улиците Егнација или авенијата Никис, која се протега покрај морето.
Добра вест за возачите е што улицата Егнација повеќе не е под градежни работи и сите сообраќајни ленти повторно се пуштени во употреба. Дополнително, на улицата Цимиски и на авенијата Никис сообраќајната полиција постојано контролира за да спречи непрописно запирање и да овозможи подобар проток на возилата.
Проектот за новиот надвозник претставува најголем инфраструктурен зафат во северниот дел на Грција во последните неколку децении. Се гради нова делница долга околу 13 километри, која треба значително да ја растовари постојната обиколница и да овозможи побрзо, побезбедно и поефикасно движење низ Солун.
Изградбата започна во 2023 година и се реализира во повеќе фази. Најинтензивните активности се планирани за 2026 година, а завршувањето на целиот проект се очекува до крајот на 2027 година.
Во текот на 2026 година повремено ќе има затворање на поединечни коловозни ленти, најчесто во текот на викендите и во вечерните часови, со цел да се избегне поголемо нарушување на сообраќајот преку ден. Според грчките власти, работите се организирани така што туристичката сезона нема значително да биде погодена.
По завршувањето на проектот, Солун ќе добие модерен бесплатен автопат кој значително ќе го подобри поврзувањето на источниот дел од градот со јужните населби, аеродромот, автопатот Егнација Одос и Халкидики. Покрај изградбата на 13 километри нов пат, ќе бидат изградени и осум километри надвозник, девет клучки, десет надпатници и три нови тунели.
Со реализацијата на проектот се очекува значително подобрување на безбедноста во сообраќајот, намалување на метежот и загадувањето, како и можност новата сообраќајница да опслужува околу 10.000 возила на час во секој правец, што ќе придонесе за побрзо и побезбедно патување кон најпосетуваните туристички дестинации во Грција.
