Премиерот Христијан Мицкоски денеска се осврна на прашањето за пензиите, нагласувајќи дека Владата и понатаму ќе работи во интерес на пензионерите, но засега не најави ново конкретно зголемување.
Тој потсети дека пред доаѓањето на власт ветиле линеарно покачување од 5.000 денари за сите пензионери, а, како што истакна, Владата обезбедила уште поголемо зголемување – вкупно 7.000 денари.
Мицкоски рече дека ова решение било оспорувано пред Уставниот суд, при што, според него, лица блиски до тогашната власт и опозицијата поднеле иницијативи за преиспитување на неговата уставност. Тој оцени дека, и покрај критиките, мерката им донела значително олеснување на пензионерите.
Според премиерот, во семејства каде што има двајца пензионери, линеарното покачување значи дополнителни 14.000 денари месечно, што, како што рече, придонело за подостоинствен живот и полесно справување со секојдневните трошоци.
Тој направи споредба со претходните години, кога пензиите, според него, се зголемувале за симболични износи од по неколку десетици денари, оценувајќи дека сегашното покачување претставува значително подобрување.
Иако не соопшти дали наскоро ќе има ново зголемување на пензиите, Мицкоски порача дека Владата ќе продолжи да носи политики насочени кон подобрување на животниот стандард на пензионерите и на сите граѓани.
