Црна Гора ова лето ќе располага со еден од најмоќните противпожарни авиони во Европа, откако потпиша договор вреден 3,5 милиони евра за изнајмување на авионот „Антонов АН-32P“.
Според договорот, склучен со украинската компанија „Ксена“, авионот ќе биде ангажиран во период од три месеци. Во цената е вклучен целосен екипаж составен од пилоти, техничари и механичари, како и целосно осигурување на леталото.
„Антонов АН-32P“ може да понесе до осум тони вода при едно полнење, што го прави значително помоќен од авионите „Ер Трактор“, кои носат околу три тони, и од „Канадер“, чиј капацитет е меѓу пет и шест тони.
Овој авион веќе беше ангажиран во Црна Гора минатата година, кога беше обезбеден како помош преку Обединетите Арапски Емирати. Очигледно, неговите перформанси ги оправдале очекувањата, па годинава црногорските власти одлучија самостојно да го изнајмат, издвојувајќи околу 1,1 милион евра месечно.
Покрај новиот авион, Црна Гора располага и со еден оперативен „Ер Трактор“, додека уште два авиони од истиот тип моментално се на сервис.
Во последните години сè повеќе држави од регионот се одлучуваат на изнајмување специјализирани противпожарни авиони. Турција минатата година користеше летала од приватна компанија од Луксембург, Босна и Херцеговина сезонава ангажира два „Ер Трактор“ авиони од Хрватска, а во минатото и Македонија добиваше помош од странски противпожарни воздухоплови за справување со големите шумски пожари.
