На „Титовиот плоштад“ во Велење, Словенија, синоќа се случи невиден вандализам – од споменикот на Јосип Броз Тито била отстранета целата бронзена глава. Полицијата брзо реагирала и го пронашла осомничениот, 49-годишен жител на Велење, кој ја превезувал украдената глава во багажникот на своето возило.
Инцидентот бил пријавен од граѓанин кој видел маж како товари голем метален предмет во темна „Шкода Кодијак“, по што полицијата веднаш започнала потрага. Возилото било лоцирано, а патролата утврдила дека има две различни хрватски регистарски таблички.
Во багажникот, полицијата ја пронашла бронзената глава од повеќе од шест метри високата скулптура на Тито – еден од најпрепознатливите симболи на Велење.
Полициската управа во Целје изјави дека станува збор за сериозно сквернавење на културно и историско наследство, а против осомничениот се води истрага за кривично дело „оштетување или уништување предмети од особено културно значење“.
Локалната самоуправа го осуди нападот како „брутален и неприфатлив чин“ и најави санација на споменикот веднаш по завршување на истражните дејствија.
