Израелската јавност е длабоко вознемирена по трагичната вест дека 28-годишен резервен офицер од бригадата „Гивати“ извршил самоубиство, а причината – според локалните медиуми – е тешката психолошка траума поврзана со неговото учество во војната во Газа.
Според весникот Израел Хајом, офицерот Томас Еџгоскус се соочувал со интензивно посттрауматско стресно нарушување уште од настаните од 7 октомври 2023 година, кога израелските сили водеа жестоки борби околу населбите покрај границата со Газа, како и подоцна при копнените операции во енклавата.
Во последната објава пред смртта, младиот офицер напишал дека „повеќе не може да продолжи да живее“, опишувајќи се себеси како „уништено и изгубено“ лице – зборови што многумина ги гледаат како крик за помош што останал незабележан.
Официјалните податоци од израелската армија покажуваат драматичен раст на психолошката криза кај војниците: во последните 18 месеци забележани се 279 обиди за самоубиство, од кои 36 завршиле фатално. Во последниот интерен извештај се наведува дека најголемиот дел од случаите се директно поврзани со екстремните услови и континуираното изложување на траума во Газа.
Иако на 10 октомври годинава беше договорен прекин на огнот, борбите продолжуваат речиси секојдневно, а хуманитарната состојба во Појасот Газа останува катастрофална, со сериозни ограничувања на храна, лекови и основна помош за 2,4 милиони жители.
Од почетокот на израелските операции во 2023 година, загинаа повеќе од 70.000 Палестинци, најголем дел жени и деца, додека над 171.000 се повредени.
Трагедијата на Еџгоскус повторно го отвори прашањето за психичкото здравје на израелските војници и огромната траума што ја носи војната – од која, очигледно, многумина не успеваат да се опорават.
