Поранешниот командант на Војската на Република Српска, Ратко Младиќ, беше погребан на Топчидерските гробишта во Белград, а покрај воениот протокол и големиот број присутни, внимание привлекоа и два симбола поврзани со неговиот живот – офицерскиот меч и прстените.
Ковчегот до семејната гробница бил пренесен со воени почести, а неговиот син Дарко Младиќ го носел офицерскиот меч. Покрај одарот биле поставени и одликувањата.
Што симболизира офицерскиот меч?
Офицерскиот, односно парадниот меч, традиционално е поврзан со воениот чин и офицерската служба. Во погребниот протокол неговото поставување покрај одарот симболично го означува крајот на воената служба на починатиот.
Покрај мечот, на погребот внимание привлекол и прстен што сега го носи неговиот син Дарко.
Според претходно раскажување на Дарко Младиќ, станува збор за семеен прстен кој неговиот татко го добил од мајка му откако во 1978 година ја завршил командно-штабната академија како прв во класата.
Дарко раскажал дека бурмата на неговиот татко во тоа време веќе била мала и оштетена, па од нејзиното злато бил изработен прстенот. Според неговото толкување, тој претставувал симбол на верност кон семејството и народот.
Младиќ имал и втор прстен, кој, според неговиот син, го добил како подарок од поранешен војник од Штип кој подоцна живеел во Ротердам. На него имало лик на индијански поглавица, а Дарко претходно изјавил дека неговиот татко го носел за време на судењата во Хаг како личен политички симбол.
На погребот Дарко Младиќ одржал и емотивен говор, во кој потсетил на животот на својот татко и навел дека уште во 1994 година заедно го избрале местото на кое сакал да биде погребан.
Ратко Младиќ беше поранешен командант на Војската на Република Српска и беше правосилно осуден од меѓународниот суд во Хаг на доживотен затвор за геноцид во Сребреница, злосторства против човештвото и воени злосторства.
