Најмалку пет земјотреси биле регистрирани во близина на Сицилија, при што најсилниот достигнал магнитуда од 5,0 степени според Рихтеровата скала, покажуваат податоците на Италијанскиот национален институт за геофизика и вулканологија (INGV).
Поради можноста од појава на цунами, било издадено портокалово предупредување, а властите најавиле евакуација на одредени училишта и јавни институции како превентивна мерка.
Првиот земјотрес бил регистриран во 11:51 часот, додека најсилните потреси се случиле во 12:19 часот. Земјотресите силно се почувствувале во Палермо, но и во други делови на Сицилија, меѓу кои Катанија и Еолските Острови.
Епицентарот на најсилниот потрес бил во морето, северозападно од Еолските Острови, во близина на островот Аликуди.
Според првичните информации, засега нема пријавени повредени лица, ниту информации за материјална штета. Сепак, Агенцијата за цивилна заштита на Сицилија го подигнала нивото на тревога поради потенцијалната опасност од цунами.
Раководителот на агенцијата, Салво Кочина, им наложил на надлежните служби и локалните власти во погодените подрачја да бидат во состојба на висока готовност и внимателно да ја следат ситуацијата.
Градоначалникот на Палермо, Роберто Лагала, потврдил дека одредени училишта и јавни институции ќе бидат евакуирани од претпазливост.
„Внимателно ја следиме ситуацијата како што се одвива и сме во постојан контакт со сите надлежни служби. Во моментов нема извештаи за повредени или за материјална штета, но сметаме дека е наша должност да ги преземеме сите неопходни мерки за да ја осигураме безбедноста на граѓаните“, изјавил Лагала.
Надлежните служби продолжуваат да ја следат состојбата, додека предупредувањето е насочено кон навремена заштита на населението во потенцијално загрозените области.
