Полскиот претседател Карол Навроцки денеска во Варшава изјави дека, според неговото мислење, украинската јавност недоволно го препознава обемот на поддршката што Полска ѝ ја обезбедува на Украина во војната со Русија. Пораката ја упати директно до украинскиот претседател Володимир Зеленски за време на заедничка прес-конференција.
Изјавата потсети на тензичната средба меѓу Зеленски и американскиот претседател Доналд Трамп во Белата куќа во февруари, кога и американскиот потпретседател Џеј Ди Венс јавно го критикуваше украинскиот лидер поради, како што беше наведено, недоволна благодарност за поддршката од САД.
Полска од почетокот на руската инвазија во 2022 година прифати над еден милион украински бегалци и се вбројува меѓу клучните снабдувачи на Украина со оружје. Земјата претставува и главен логистички коридор за испорака на западна воена и хуманитарна помош кон Киев.
„Во Полска постои чувство дека огромниот ангажман и континуираната помош за Украина од почетокот на целосната инвазија не се доволно признаени или разбрани“, истакна Навроцки, додавајќи дека ова прашање го отворил во директен, искрен, но пријателски разговор со Зеленски.
Украинскиот претседател, од своја страна, нагласи дека Украина отсекогаш ја ценела поддршката од Полска и дека таа благодарност останува непроменета. Тој посочи дека Украина со големи човечки жртви ја брани и безбедноста на Европа од руската агресија.
„Русија се обидува да внесе поделби и да го ослаби сојузот меѓу нашите две држави, изграден низ генерации. Тоа нема да го дозволиме“, порача Зеленски.
Навроцки, исто така, повтори дека е потребна поинтензивна соработка меѓу двете земји околу историските прашања поврзани со масакрот на околу 100.000 Полјаци во регионот Волин, извршен од украински националисти меѓу 1943 и 1945 година. Тој оцени дека станува збор за геноцид и го обвини Киев за одолговлекување на процесите за признавање и ексхумација на жртвите.
Зеленски во четвртокот изрази подготвеност за напредок во оваа насока, наведувајќи дека украинската страна е подготвена на конкретни чекори за забрзување на процесот.
По средбата, украинскиот претседател на платформата „Икс“ оцени дека односите меѓу двете земји влегуваат во „нова фаза“.
„Ова се лоши вести за Путин“, напиша Зеленски.
