Од 1 февруари, посетителите ќе треба да платат надомест од две евра за поблизок пристап до фонтаната ди Треви во Рим, една од најпознатите и најпосетувани знаменитости во италијанската престолнина. Исклучок ќе имаат жителите на Рим, за кои влезот ќе биде бесплатен, додека набљудувањето на фонтаната од подалечна дистанца ќе остане без наплата.
Градоначалникот Роберто Гвалтиери соопшти дека оваа мерка би требало да донесе околу 6,5 милиони евра годишен приход. Наплатата е дел од поширока стратегија за управување со туристичките текови, според која од почетокот на февруари ќе се воведе билет од пет евра и за уште пет значајни локации во градот.
Фонтаната ди Треви дневно ја посетуваат просечно околу 30.000 луѓе, а градските власти наведуваат дека новите правила се воведуваат поради пренатрупаноста и зачестените случаи на ситен криминал, особено џепчии. Само во периодот од 1 јануари до 8 декември, просторот околу фонтаната бил посетен од приближно девет милиони туристи.
И покрај воведувањето на надомест, традицијата на фрлање парички во фонтаната ќе продолжи.
