На Универзитетската клиника за трауматологија, ортопедски болести, анестезија, реанимација, интензивно лекување и ургентен центар (ТОАРИЛУЦ) е изведена првата комплексна хируршка интервенција од ваков вид во Македонија кај 4-годишно дете со редок конгенитален Спренгелов деформитет. Операцијата е реализирана во соработка со реномираниот ортопед проф. д-р Уфук Ајдинли од Република Турција и претставува значаен исчекор во третманот на ретки и сложени ортопедски состојби кај деца.
Интервенцијата е резултат на високо координирана мултидисциплинарна работа во која учествувале ортопедскиот тим, анестезиолози, интензивна нега и ургентна поддршка, со јасен фокус на безбедноста на пациентот и квалитетот на оперативната постапка. Со оваа операција се зајакнуваат капацитетите на македонскиот здравствен систем, но и се отвора можност ваквите сложени зафати во иднина рутински да се изведуваат во земјата.
Директорот на ТОАРИЛУЦ, проф. д-р Игор Мерџаноски, нагласува дека оваа интервенција е резултат на врвна стручна координација и успешна меѓународна соработка. Според него, преку заедничка работа со искусни странски експерти се овозможува трансфер на знаење и примена на современи оперативни техники, со што се поставуваат темели ваквите процедури да станат стандарден дел од клиничката пракса во Македонија.
Министерот за здравство, Азир Алиу, истакнува дека довербата во здравствениот систем се гради токму преку вакви резултати. Тој посочува дека меѓународната соработка и размената на експертиза директно придонесуваат за подобра грижа за пациентите, а Министерството ќе продолжи со поддршка на модернизацијата на клиниките, развојот на медицинскиот кадар и воведувањето современи медицински методи.
Спренгеловиот деформитет е ретка конгенитална аномалија при која лопатката е поставена ненормално високо и е недоволно развиена поради нарушена надолна миграција во текот на ембрионалниот развој. Оваа состојба често предизвикува видлива испакнатина на рамениот појас и значително ограничување на движењето на рамото. Во одредени случаи, деформитетот е поврзан и со други аномалии, како синдромот Клипел-Фил, сколиоза, како и присуство на дополнителна коскена или влакнеста врска со ’рбетот, позната како омовертебрална лента.
За прецизна дијагностика и детално оперативно планирање најчесто се користат напредни дијагностички методи како компјутерска томографија и магнетна резонанца. Оперативниот третман се препорачува кај потешки форми на деформитетот, најчесто во возраст од 3 до 8 години, со цел подобрување на функционалноста на рамото и корекција на естетскиот изглед.
Со оваа интервенција, македонското здравство прави важен чекор напред во третманот на ретки детски ортопедски состојби, отворајќи нови можности за навремена и квалитетна медицинска грижа во рамки на домашниот здравствен систем.
