Македонија направи значаен чекор кон забрзување на енергетската транзиција со донесувањето на новиот Закон за користење енергија од обновливи извори, кој има за цел да го зголеми домашното производство на електрична енергија, да ги олесни инвестициите и да им овозможи на граѓаните поактивно да учествуваат во енергетскиот систем.
Новата законска рамка предвидува поедноставени административни постапки, побрзо одобрување на проекти за обновливи извори на енергија, можност за формирање енергетски заедници и дополнителни олеснувања за поставување соларни панели на домовите.
Главната цел е постепено намалување на зависноста од увоз на електрична енергија, зајакнување на енергетската сигурност и усогласување на земјата со европските стандарди и политики во оваа област.
Законот е усогласен со Директивата (ЕУ) 2018/2001 за промоција на користењето енергија од обновливи извори, како и со европските иницијативи „Fit for 55“ и REPowerEU. Иако веќе е изгласан, најголемиот дел од неговите одредби ќе почнат да се применуваат од 2028 година. Во меѓувреме, институциите ќе треба да ги донесат потребните подзаконски акти и да ја воспостават неопходната инфраструктура за негова целосна примена.
Една од најзначајните новини е што проектите за производство на електрична енергија од обновливи извори добиваат статус на јавен интерес. Тоа значи дека надлежните институции ќе имаат обврска приоритетно да ги разгледуваат барањата за изградба, одобрување и приклучување на нови енергетски капацитети.
Со новите законски решенија се воведуваат и пократки, јасно дефинирани рокови за административните процедури, со што инвеститорите повеќе нема да треба со години да чекаат различни согласности и дозволи за реализација на своите проекти.
