Со високите летни температури, електролитските напитоци повторно станаа популарни, а многумина веруваат дека се неопходни за добра хидратација. Сепак, експертите велат дека за повеќето луѓе тие не се потребни.
Електролитите се минерали како натриум, калиум, калциум и магнезиум, кои помагаат во регулирањето на течностите во организмот, правилната работа на мускулите и нервниот систем, како и одржувањето на енергетската рамнотежа.
Овие минерали природно се наоѓаат во бројни намирници, меѓу кои банани, млеко, јогурт, зелен лиснат зеленчук, јаткасти плодови и кокосова вода.
Според нутриционистката Кери Торенс, кај повеќето здрави луѓе нема потреба од дополнителен внес на електролити, бидејќи бубрезите природно ја одржуваат нивната рамнотежа, а разновидната исхрана ги обезбедува потребните количини.
Сличен став има и професорот по физиологија Греам Клоуз, кој посочува дека за лицата кои вежбаат помалку од еден час, обичната вода најчесто е сосема доволна за правилна хидратација.
Електролитските напитоци можат да бидат корисни при долготрајни и интензивни физички активности, кога организмот преку потење губи значително количество течности и минерали.
Експертите предупредуваат и дека треба внимателно да се следат советите на социјалните мрежи, бидејќи многу инфлуенсери ги промовираат овие производи како дел од платени кампањи, без медицинска или нутриционистичка стручност.
Наместо да се потпирате на интернет-трендови, најдобро е здравствените совети да ги барате од лекари, нутриционисти и научно потврдени извори.
