Украинскиот претседател Володимир Зеленски најави големи промени во Владата и предложи смена на премиерката Јулија Свириденко, објавувајќи ја одлуката преку својот профил на социјалната мрежа Икс.
Зеленски ѝ се заблагодари на Свириденко за досегашната работа, нагласувајќи дека таа извршувала „јасна, посветена и ефикасна“ работа како премиерка, но истовремено откри дека ѝ понудил нова важна улога поврзана со односите со еден од стратешките партнери на Украина.
„Благодарен сум ѝ на Јулија за нејзината јасна, посветена и ефикасна работа како премиерка, како и за годините служба во украинскиот тим. Очекувам, заедно со пратениците, да ги спроведеме потребните промени во Владата“, напиша Зеленски.
Украинскиот лидер не откри детали за новата функција што би ја презела Свириденко, ниту го соопшти името на нејзиниот можен наследник, но посочи дека промените се дел од поширока политичка стратегија.
Свириденко беше избрана за премиерка во јули 2025 година. Според најавите, освен промените во Владата, се очекуваат и измени во раководството на институциите задолжени за спроведување на законот.
Опозицискиот пратеник Јарослав Железњак изјави дека постои можност Свириденко да биде назначена за нова амбасадорка на Украина во Соединетите Американски Држави.
Според украинското законодавство, оставката или разрешувањето на премиерот мора да биде изгласано во парламентот, а со тоа автоматски се активира и оставката на целата Влада.
Како можни кандидати за нов премиер се споменуваат министерот за енергетика Денис Шмихал, министерот за одбрана Михајло Федоров и директорот на државната енергетска компанија „Нафтогас“, Серхиј Корецки.
Најавената реконструкција доаѓа во период кога Украина се соочува со продолжување на војната, големи економски предизвици и потреба од дополнително зајакнување на соработката со меѓународните партнери.
