Иако се очекува цените на авионското гориво да се стабилизираат по периодот на раст предизвикан од геополитичките тензии, патниците веројатно нема да видат поевтини билети во скоро време. Причината, според анализите, не лежи само во трошоците, туку и во рекордно високата побарувачка за патувања.
Во извештаите на CNN се наведува дека авиокомпаниите веќе ја користат ситуацијата за да ги одржат повисоките цени, бидејќи патниците продолжуваат да купуваат билети и покрај поскапувањата. Тоа создава услови во кои намалувањето на цената на горивото не мора автоматски да значи и поевтинување на авионските карти.
Извршниот директор на United Airlines, Скот Кирби, отворено изјави дека колку подолго патниците прифаќаат повисоки цени, толку поголема е веројатноста тие да останат трајни. Според податоците, клиентите на оваа компанија веќе плаќаат значително повеќе по километар во споредба со претходната година.
Сличен став има и раководството на American Airlines, каде извршниот директор Роберт Исом истакна дека патниците сè почесто се подготвени да платат повеќе за дополнителен комфор, што дополнително ја зацврстува новата ценовна политика во индустријата.
Главниот проблем, сепак, е трошокот за гориво, кој речиси се удвоил од почетокот на годината. Тоа го прави авиогоривото една од најголемите ставки во работењето на компаниите, веднаш по платите на персоналот. Четирите најголеми американски авиопревозници, меѓу кои Delta Air Lines и Southwest Airlines, трошат огромни суми дневно, а дел од нив веќе пријавуваат милијарди долари дополнителни трошоци.
Сепак, цените на билетите не се директно врзани за трошоците, туку главно за побарувачката. Тоа значи дека пополнетите летови, особено на популарни рути, остануваат скапи без разлика на цената на горивото. Поради тоа, авиокомпаниите дури и ги намалуваат помалку профитабилните линии, што дополнително ја крева просечната цена на патување.
Дополнителен фактор е можното слабеење на нискобуџетните авиопревозници, како Spirit Airlines, кои се под притисок поради високите трошоци. Доколку тие исчезнат или се намалат, конкуренцијата ќе биде послаба, што им остава уште повеќе простор на големите компании да ги задржат високите цени.
Овој тренд веќе предизвикува реакции и критики во јавноста. Политичари како Ричи Торес ја обвинуваат индустријата дека свесно ги задржува високите цени за да оствари поголем профит, наместо да ги пренесе евентуалните заштеди на патниците.
Во ваква ситуација, експертите предупредуваат дека и ако горивото поевтини, цените на авионските билети најверојатно ќе останат високи – не поради трошоците, туку поради пазарната логика и силната побарувачка која ја диктира индустријата.
