Двајца американски конгресмени поднесоа предлог-закон со кој се предвидуваат санкции и визиски ограничувања за лица кои ги поткопуваат демократските процеси, мирот и стабилноста на Западен Балкан, а во документот директно се споменува и српскиот претседател Александар Вучиќ.
Иницијативата ја поднеле републиканецот Џо Вилсон од Јужна Каролина и демократот Бил Китинг од Масачусетс, двајцата членови на Комитетот за надворешни работи на Претставничкиот дом.
Според нив, Србија треба да покаже поголема посветеност на владеењето на правото, демократските стандарди и борбата против корупцијата.
Вилсон, во изјава за „The Hill“, оцени дека Србија под власта на Вучиќ се оддалечила од владеењето на правото, додека истовремено ги продлабочила односите со Русија, Кина и Иран. Тој ги спомена и повеќемесечните антикорупциски протести во земјата.
Во предлогот Вучиќ е повикан да одговори на наводите за прекумерна употреба на сила врз демонстрантите. Американските конгресмени бараат и истрага и утврдување одговорност за трагедијата со падот на бетонската настрешница на железничката станица во Нови Сад, настан што предизвика масовни студентски протести.
Китинг, пак, порача дека демократијата, владеењето на правото и борбата против корупцијата треба да останат меѓу главните столбови во односите меѓу Вашингтон и Белград.
Во документот се наведува дека долгорочен интерес на САД е „стабилна, демократска и суверена Србија“, посветена на регионалниот мир и безбедност и ослободена од, како што се наведува, малигни надворешни влијанија.
Иницијативата доаѓа во чувствителен политички период за Србија, по повеќемесечните студентски протести и барањата за поголема транспарентност и одговорност.
„The Hill“ забележува дека острите критики кон Вучиќ во предлогот се разликуваат од неговиот генерално добар однос со американскиот претседател Доналд Трамп.
Вучиќ претходно најави парламентарни избори во октомври, додека прашањето за изборните услови и политичката конкуренција останува една од главните теми во Србија.
Сепак, станува збор за предлог-закон, а не за веќе воведени американски санкции. За мерките да добијат правна сила, иницијативата треба да ја помине предвидената законодавна процедура во САД.
