Шведската влада воведе нови ограничувања за користење на вештачката интелигенција во државната администрација. Од понеделник, 26 октомври, вработените повеќе не смеат да ги користат интернет-верзиите на ChatGPT и Claude на своите службени компјутери.
Причината за ваквата одлука е загриженоста за безбедноста на чувствителните информации и можноста службени податоци да завршат на надворешни платформи без соодветна заштита.
Одлуката следува по анализа спроведена претходно годинава, која покажала дека одредени алатки за вештачка интелигенција биле користени на проблематичен начин при извршувањето службени задачи.
Надлежните предупредуваат дека внесувањето доверливи информации во вакви системи, без соодветни договори за заштита на податоците, може да создаде ризик од нивно складирање или користење за тренирање модели.
Вештачката интелигенција не е целосно забранета
Директорот за дигитализација во Канцеларијата на шведската влада, Микаел Ветеркранц, предупредил дека користењето неодобрени информатички алатки може да има последици за информациската безбедност.
Како алтернатива, на државните службеници им се препорачува Microsoft Copilot, кој поминал безбедносна проверка и е опфатен со договор за заштита на податоците.
Ограничен број вработени ќе можат да продолжат да користат ChatGPT и Claude, но исклучиво преку посебна платформа за асистенти со вештачка интелигенција развиена од шведските власти.
Слични ограничувања веќе се воведени и во Шведската даночна управа и Националниот одбор за институционална грижа, додека други институции разгледуваат такви мерки.
Ова не претставува општа забрана за користење ChatGPT и Claude во Шведска, туку ограничување на нивната употреба во одредени државни институции, со цел подобра заштита на службените информации.
