Американскиот претседател Доналд Трамп, според медиумски информации, разгледува неочекуван политички потег – поддршка за поранешниот унгарски премиер Виктор Орбан како кандидат за нов генерален секретар на Обединетите нации.
Како што пренесува „Џерусалем пост“, повикувајќи се на извори од три држави, американски претставници веќе разговарале со Орбан и го охрабриле да размисли за кандидатура.
Орбан наводно покажал интерес, но сè уште не донел конечна одлука.
Вашингтон верува дека кандидатурата би можела да добие поддршка и од Русија и Кина, што би го направило Орбан заеднички кандидат на три светски сили.
Според проценките на американски функционер, Орбан би можел да обезбеди поддршка од осум до десет членки на Советот за безбедност на ОН, кој има вкупно 15 членки.
Сепак, клучно останува прашањето како ќе реагираат Велика Британија и Франција, кои како постојани членки располагаат со право на вето.
Мандатот на актуелниот генерален секретар Антонио Гутереш истекува на 31 декември, а разговорите за неговиот наследник веќе се интензивираат.
Орбан, кој со години имаше блиски политички односи со Трамп, во минатото често влегуваше во конфликти со Европската Унија, додека истовремено одржуваше блиски врски со Москва и Пекинг.
Според извештајот, Трамп и американскиот потпретседател Џеј Ди Венс би можеле активно да ја поддржат неговата кандидатура, доколку Орбан одлучи да влезе во трката.
Можната кандидатура веќе отвора прашања за идната улога на Обединетите нации, особено поради загриженоста дека блиските односи на Орбан со рускиот претседател Владимир Путин би можеле да влијаат врз неговата независност.
Меѓу другите потенцијални кандидати се споменува и дипломатката од Обединетите Арапски Емирати, Лана Нусеибех.
Засега нема официјална потврда дека Орбан ќе се кандидира, ниту јавно преземени обврски од други држави дека ќе го поддржат.
Доколку кандидатурата се реализира, изборот на новиот генерален секретар би можел да прерасне во едно од најзначајните дипломатски надмудрувања меѓу светските сили.
