Стотици скијачи се собраа на снежна падина во Кран-Монтана, Швајцарија, каде што со своите тела формираа големо срце во знак на сеќавање и солидарност со жртвите од смртоносниот пожар што избувна за време на новогодишната ноќ во локалниот бар „Ле Констелејшн“. Во трагедијата животот го загубија 40 лица, а повеќе од 100 беа повредени.
Иницијативата беше организирана од Швајцарското училиште во Кран-Монтана, заедно со неколку скијачки клубови од регионот, а поддршка даде и Туристичко-конгресната организација на Кран-Монтана. Настанот беше одржан на падината Белалуи, дел од скијачката област Кран-Монтана, каде што традиционално се одржуваат стартовите за машкиот спуст во Светскиот куп.
Според проценките на туристичкиот одбор, околу илјада луѓе учествувале во симболичниот чин, кој беше снимен и споделен како видео-порака на сочувство и заедништво.
Во меѓувреме, локалните власти информираа дека од 2019 година во барот „Ле Констелејшн“ не биле спроведени противпожарни инспекции. Истражителите наведуваат дека пожарот најверојатно бил предизвикан од прскалки поставени врз шишиња шампањ, кои биле премногу блиску до таванот. Дополнително, се испитува дали звучноизолациониот материјал на таванот бил во согласност со важечките безбедносни прописи.
Настанот со формирањето на срцето испрати силна порака за почит кон жртвите и повик за поголема одговорност и безбедност, за вакви трагедии никогаш повеќе да не се повторат.
