На социјалните мрежи се појави вознемирувачка снимка која за кратко време предизвика бурни реакции во јавноста. На видеото се гледа како лекар во болничка установа физички напаѓа пациент, наводно поради расправија околу начинот на комуникација.
Според информациите што ги пренесуваат странските медиуми, инцидентот се случил во Медицинскиот факултет „Индира Ганди“ (IGMC) во Шимла, на северот од Индија. Пациентот, Арџун Панар, дошол во болницата поради сериозни проблеми со дишењето и бил сместен на болнички кревет во друго одделение по извршени медицински прегледи.
Тој тврди дека без никаква претходна провокација, лекарот започнал да му се обраќа со груб и непристоен тон. Кога пациентот реагирал и побарал разговор со повеќе почит, ситуацијата, според неговите зборови, ескалирала.
На видеото, кое брзо стана вирално, се гледа како лекарот неколкупати го удира пациентот со тупаници, додека тој се обидува да се заштити. Снимката предизвика гнев кај јавноста, а набргу по нејзиното појавување, пред болницата се собрале граѓани кои барале одговорност и итна реакција од надлежните институции.
По инцидентот, управата на болницата соопшти дека е формирана тричлена истражна комисија која ќе ги утврдува сите околности на случајот. Медицинскиот надзорник на IGMC, д-р Рахул Рао, изјави дека истрагата е во тек и дека против лекарот веќе е поднесена и полициска пријава.
Овој настан повторно ја отвори дебатата за односот меѓу медицинскиот персонал и пациентите, како и за потребата од јасни механизми за заштита на пациентските права. Надлежните најавуваат дека јавноста ќе биде информирана веднаш по завршувањето на истрагата и донесувањето на конечните одлуки.
