Група одбранбени експерти, меѓу кои сегашни и поранешни припадници на вооружените сили, владини и НАТО функционери, како и специјалисти од одбранбената индустрија, предупредија дека Обединетото Кралство и неговите сојузници не се доволно подготвени за потенцијален конфликт во Европа, кој според нивните проценки би можел да избие во следните неколку години. Состанокот се одржа минатиот месец во Вајтхол.
Експертите истакнуваат дека Русија веќе води хибридна војна против Западот, користејќи саботажи, дезинформации и напади врз критичната инфраструктура. Тие предупредуваат дека овие активности веќе предизвикаа растечки страв кај граѓаните, особено во регионот на Балтикот, каде нарушувањата на воздушниот простор и дронските активности се сè почести.
Според нивните анализи, Русија би можела да се обиде на директна воена акција против Европа во следните три до пет години. Меѓутоа, експертите предупредуваат дека одбранбените планови на хартија сè уште не се целосно применети, а сегашното темпо на подготовка значи дека Обединетото Кралство би било подготвено за војна дури за околу 10 години – многу подоцна отколку што може да се појави реалната закана.
Некои европски земји веќе преземаа чекори за зголемена подготвеност. Шведска, Финска, Литванија и Латвија ја зајакнаа граѓанската и воената одбрана, додека Германија и Полска воведоа програми за доброволна воена обука. Сепак, експертите нагласуваат дека успешноста на овие мерки зависи од довербата на граѓаните во институциите и нивната подготвеност активно да се вклучат во заштита на општото добро.
Тие заклучуваат дека покрај зголемување на финансирањето на одбраната, потребна е и промена на менталитетот на европските влади и граѓани, кои мора да ја разберат сериозноста на заканата и да бидат подготвени да реагираат навреме.
