Еден израелски војник е повреден во експлозија што се случи во јужниот дел на Газа, а Тел Авив ја обвини организацијата „Хамас“ за кршење на примирјето, кое е во сила од 10 октомври.
Висок функционер на „Хамас“, Махмуд Мрдави, изјави дека експлозијата е предизвикана од неексплодирана муниција и дека групата ги информирала медијаторите. Подоцна, „Хамас“ ја негираше својата одговорност и ја опиша опасната муниција како „воен отпад“ поставен од Израел.
Израелската војска ги одби овие тврдења, а премиерот Бенјамин Нетанјаху го оцени инцидентот како кршење на примирјето, најавувајќи дека Израел „ќе одговори соодветно“.
Експлозијата се случила додека „Хамас“ се состанувал со турски претставници во Анкара за да се дискутира втората фаза од примирјето. И покрај тоа што првата фаза на договорот е делумно почитувана, прогресот е бавен.
Според Израелската армија, експлозивната направа детонирала додека војниците демонтирале милитантна инфраструктура во градот Рафа. Еден војник е полесно повреден и хоспитализиран, а инцидентот дополнително ја загрозува кревката ситуација во регионот.
Втората фаза од примирјето предвидува распоредување на меѓународни сили за стабилизација, формирање на технократско управно тело за Газа, разоружување на „Хамас“ и повлекување на израелската војска, што претставува голем предизвик за двете страни.
