Шри Ланка се соочува со најголемиот бран на денга треска во последната деценија. Од почетокот на годината досега се регистрирани повеќе од 77.000 заразени лица, а 56 луѓе ја загубиле битката со болеста.
Особено загрижувачки е фактот што бројот на заболени нагло се зголемува во последниот период. Само во текот на јули биле пријавени повеќе од една четвртина од вкупниот број случаи забележани годинава, што ги натера властите да преземат вонредни мерки за спречување на понатамошното ширење на вирусот.
Поради сериозноста на епидемијата, во акцијата е вклучена и армијата, која со помош на дронови ги проверува тешко достапните места, како покриви на куќи, училишта и градилишта. Целта е да се откријат места со застојана вода, каде што комарците кои го пренесуваат вирусот можат да се размножуваат.
Покрај воените тимови, и полицијата спроведува засилени контроли низ домовите и објектите. Само овој месец биле отстранети речиси 11.000 потенцијални жаришта на комарци, а повеќе од 4.000 сопственици на објекти добиле казни поради несоодветно одржување на просторот.
Денга е вирусно заболување кое се пренесува преку каснување од заразени комарци од родот Aedes. Кај голем број заразени лица болеста може да помине без забележливи симптоми, но кај други може да предизвика висока температура, силна главоболка, болки во мускулите и зглобовите, гадење и појава на осип.
Во потешките случаи, инфекцијата може да доведе до сериозни компликации, вклучително и внатрешни крвавења, што може да има и фатален исход.
Експертите предупредуваат дека ситуацијата е дополнително сложена бидејќи постојат четири различни соеви на вирусот денга. Доколку лице еднаш прележи еден сој, тоа не значи дека е заштитено од останатите. Напротив, повторната инфекција со различен сој може да предизвика потешка форма на болеста.
Во моментов не постои универзална вакцина која целосно штити од сите видови на вирусот. Поради тоа, третманот најчесто се заснова на ублажување на симптомите, додека пациентите со потешка клиничка слика мора да бидат под постојан лекарски надзор во болнички услови.
Здравствените власти сметаат дека една од причините за наглото зголемување на бројот на заразени е циклонот што ја погоди Шри Ланка во декември минатата година. По невремето останале големи количества отпад и застојана вода, создавајќи идеални услови за размножување на комарците.
Светската здравствена организација предупредува дека денга треската станува сè поголем глобален здравствен проблем. Според податоците на организацијата, бројот на пријавени случаи во светот се зголемил од околу 500.000 во 2000 година на 14,4 милиони случаи во 2024 година.
Дополнителна загриженост создаваат и климатските промени, бидејќи комарците кои го пренесуваат вирусот сè почесто се појавуваат во нови региони, вклучително и делови од Европа и Медитеранот.
