Србија ќе продолжи по патот на европските интеграции, дијалогот за Косово ќе продолжи, а за евентуалното воведување санкции кон Русија ќе одлучуваат граѓаните на референдум. Ова се дел од главните насоки на надворешнополитичкиот план на Студентската листа, чии претставници најавуваат и посети на Москва и Вашингтон со цел договарање долгорочни економски и енергетски аранжмани.
Откако стана јасно дека Студентската листа ќе ја преземе власта во Србија, се отвори прашањето дали ќе ја задржи досегашната политика на „четири столба“ во дипломатијата – Русија, Европската Унија, САД и Кина – или ќе направи промени во надворешнополитичката стратегија.
Според досега објавените ставови на нејзините претставници, Србија ќе продолжи да ги негува односите со клучните меѓународни актери, додека одлуката за санкциите кон Русија би била ставена пред граѓаните.
Европска Унија: Интеграциите продолжуваат
Во пресрет на изборите, од Студентската листа порачаа дека меѓународната позиција на Србија нема да претрпи промени, бидејќи приоритет ќе бидат реформите во државата, особено во областа на демократијата и владеењето на правото.
Во разговор за РТС, Илија Срдановиќ, кој се наоѓа на првото место на Студентската листа, два дена по изборите изјавил дека Србија останува посветена на европските интеграции.
Тој потсетил дека Србија се обврзала на процесот на пристапување кон ЕУ уште во 2000 година и нагласил дека тој процес ќе продолжи.
Срдановиќ истовремено ја критикувал претходната власт, наведувајќи дека во период од 15 години поддршката на граѓаните за европските интеграции се намалила за 20 проценти. Според него, целта на новата власт ќе биде да се избегне таков исход.
Тој најавил и усогласување на внатрешните државни политики со европските поглавја 23 и 24, кои се однесуваат на правосудството, основните права, правдата, слободата и безбедноста.
Како области на кои ќе се посвети внимание ги издвоил почитувањето на правата и еднаквоста, борбата против корупцијата, функционирањето на институциите и слободата на медиумите.
Меѓу првите што ѝ ја честитале победата на Студентската листа биле и претставници на Европската Унија. Истата вечер, околу половина час пред полноќ, претседателката на Европската комисија Урсула фон дер Лајен, претседателот на Европскиот совет Антонио Кошта и еврокомесарката за проширување Марта Кос упатиле честитки по објавувањето на резултатите од парламентарните избори во Србија.
„Во Србија може да започне ново поглавје, а вратите на ЕУ се отворени“, изјавила Марта Кос, еврокомесарката за проширување.
