Турција се соочува со катастрофални шумски пожари кои со денови беснеат во округот Којџегиз, провинција Мугла. Огнот, поттикнат од силни ветрови, брзо се шири и предизвикува масовни евакуации.
Во акцијата за гаснење се ангажирани речиси илјада пожарникари, 147 цистерни, 123 возила, 20 машини, како и 10 авиони и 14 хеликоптери. Досега се евакуирани најмалку 230 семејства, уништени се две згради, а 20 лица се повредени, од кои едно е во болница.
Во меѓувреме, пожарите во округот Аксу во Анталија се ставени под контрола, но туристи од повеќе хотели биле извлечени, а околу 150 домови во близина на Аланија морале да бидат евакуирани.
Властите апелираат на претпазливост и потсетуваат дека поради топлото време и силниот ветер ситуацијата може дополнително да се влоши.
