Една од највисоките згради во Ријад, главниот град на Саудиска Арабија, утрово претрпела материјална штета во инцидент поврзан со ракетен напад. Во кулата се наоѓа седиштето на државниот инвестициски фонд „Public Investment Fund“ (ПИФ).
Станува збор за кулата ПИФ во финансискиот кварт „Крал Абдула“, каде што, според информациите објавени од „Ројтерс“, оштетени се прозорците на седум до осум ката, а деформации има и на делови од металната фасада.
По инцидентот, влезовите во финансискиот кварт биле затворени, а луѓето од погодената област биле евакуирани. На терен биле испратени амбулантни возила и противпожарни екипи. Засега нема информации за загинати или повредени лица.
Воената коалиција предводена од Саудиска Арабија, која е во конфликт со бунтовничкото движење Хути во Јемен, соопшти дека пресретнала ракетна закана насочена кон Ријад. Според првичните информации што ги изнел портпаролот на коалицијата, генерал-мајор Турки ал Малики, остатоците од пресретнатата ракета паднале во градот и предизвикале материјална штета. Проценката на обемот на оштетувањата сè уште е во тек.
Саудискиот медиум „Араб њуз“ објави дека во 4:42 часот наутро Цивилната одбрана испратила предупредување до мобилните телефони за воздушна опасност. Неколку минути подоцна, жителите слушнале силна експлозија, по што било објавено известување дека опасноста е завршена.
„Ројтерс“, повикувајќи се на три извори запознаени со случувањата, објави дека инцидентот бил поврзан со ракетен напад на јеменските Хути. Сепак, групата засега не презела одговорност за конкретниот напад.
Ова е втор случај во помалку од две недели во кој е оштетен значаен објект во финансискиот кварт на Ријад. На 8 ноември, во претходен напад, беше оштетена административна зграда на нафтениот гигант „Сауди Арамко“. И тогаш саудиските власти соопштија дека штетата била предизвикана од остатоци од пресретнати ракети.
Последните случувања се одвиваат во период на засилени тензии и конфликт меѓу Саудиска Арабија и Хутите во Јемен, во рамките на пошироката регионална ескалација поврзана со војната со Иран. Саудиските сили во изминатиот период ги засилиле операциите против позициите на Хутите во Јемен, додека бунтовничката група продолжува со ракетни и беспилотни напади врз саудиска територија.








