Драматични воздушни кадри покажуваат американски хеликоптер како се спушта над огромен танкер во Карибите, додека вооружени специјалци по јажиња слетуваат на палубата. Видеото, објавено од американската влада, ја прикажува најновата ескалација во долгогодишниот судир меѓу Вашингтон и Каракас – заплена на танкер натоварен со венецуелска сурова нафта.
САД тврдат дека бродот бил дел од „нелегална мрежа“ за транспорт на санкционирана нафта од Венецуела и Иран, поврзана со финансирање на странски терористички организации. Венецуела жестоко возврати: министерот за надворешни работи Иван Гил ја нарече операцијата „меѓународно пиратство“, обвинувајќи го Доналд Трамп дека се обидува да ги присвои нафтените ресурси на земјата.
Елитна единица во акција
Американскиот претседател Трамп потврди дека е запленет „најголемиот танкер досега“, а операцијата ја реализирале елитните тимови на крајбрежната стража, ФБИ, Одделот за внатрешна безбедност и воените специјални единици. Според извори за Си-би-ес, во акцијата учествувале два хеликоптери и околу 20 припадници на специјалните сили.
Видеото од 45 секунди покажува како американските војници со вперени оружја ја обезбедуваат палубата, а екипажот не се гледа.
Танкер од „санкционираната флота“
Компанијата Вангард тек го идентификуваше бродот како „Скипер“, долг 333 метри, за кој постои сомнеж дека ги фалсификувал податоците за локација. Бродот е под санкции на САД од 2022 година поради наводно учество во шверц кој финансирал групи како Хезболах.
Според проценките, танкерот превезувал околу 1,8 милиони барели нафта. На прашањето што ќе се случи со товарот, Трамп кратко рече: „Ќе ја задржиме… претпоставувам.“
Каракас: Ова е агресија
Мадуро тврди дека САД го злоупотребуваат присуството на Карибите за „режимска промена“, а не за борба против дрога, како што тврди Вашингтон. Венецуела, која има најголеми резерви на нафта во светот, со години е под тешки американски санкции.
Ескалација на притисокот
Од септември, американските сили извршиле повеќе од 20 операции против бродови осомничени за транспорт на дрога, при што загинале над 80 лица – бројки кои предизвикуваат загриженост кај правни експерти, кои предупредуваат дека прогласување групи за „наркотерористи“ не претставува правен основ за воени напади.
