Најмалку 95 лица загинаа, а стотици сè уште се водат како исчезнати по катастрофалните поплави и одрони што го погодија пограничниот регион меѓу Непал и кинески Тибет.
Драматични снимки од безбедносните камери на граничниот премин го прикажуваат моментот кога луѓето почнуваат панично да бегаат, само неколку секунди пред огромен пороен бран од вода, кал и карпи да навлезе во областа и да ги збрише објектите пред себе.
Особено тешка е состојбата во планинскиот регион Расува, каде спасувачките екипи трагаат по голем број исчезнати жители и туристи.
Земјотрес регистриран непосредно пред катастрофата
Германскиот истражувачки центар за геонауки регистрирал земјотрес со магнитуда од 4,4 степени околу седум минути пред поплавата.
Непалските власти се сомневаат дека потресот можеби предизвикал лавина од мраз и карпи, која го блокирала речното корито и придонела за создавање на смртоносниот пороен бран.
Според кабинетот на непалскиот премиер, најмалку 85 припадници на армијата и полицијата се надвор од контакт.
Бројот на исчезнати туристи достигнал 484, од кои 391 се странски државјани. Меѓу нив има туристи од Индија, Велика Британија, САД и Јужна Кореја.
На кинеската страна од границата, во областа Гиронг, според ЦЦТВ, загинале најмалку три лица, а 265 се водат како исчезнати. Во спасувачката операција се вклучени стотици спасувачи, но огромните наноси од кал го отежнуваат пристапот.
Уништени мостови и патишта
Размерите на катастрофата се огромни. Поројните води уништиле 19 мостови и оштетиле околу 40 километри патна инфраструктура, додека 65 повредени лица биле згрижени во болниците во Катманду и околните региони.
Спасувачките хеликоптери не можеле да слетаат во дел од погодените планински населби поради излевањето на реката Тришули.
Властите дополнително предупредуваат дека опасноста не е помината и дека постои ризик од нов пороен бран поради препреките што сè уште се наоѓаат во горниот тек на реката Лхенде Кхола.
Видео:
