Италија и Франција постигнале договор за дополнително зајакнување на украинската противвоздушна одбрана со четири системи SAMP/T, како и со ракети „Aster 30“, пренесуваат италијанските медиуми.
Според информациите, во подготовка е 13-тиот пакет италијанска воена помош за Украина, чие одобрување се очекува во октомври. Во него треба да бидат вклучени ракети „Aster 30“ од италијанските резерви, радари „Kronos“ и компоненти од италијанско производство за системите SAMP/T.
Новите системи би требало да пристигнат во Украина на почетокот на следната година.
Украинските вооружени сили веќе располагаат со два система SAMP/T, но според медиумските извештаи, муниција за нив не била испорачана од летото 2025 година поради намалените национални резерви.
Во меѓувреме, производството е зголемено, а планот е Украина постепено да добие поголема самостојност и во производството на ракетите „Aster 30“.
Целата операција се проценува на околу три милијарди евра, а финансирањето би се реализирало преку европски кредитен механизам за Украина.
Мелони ја држи воената помош подалеку од јавноста
Според италијанските медиуми, премиерката Џорџа Мелони настојува деталите за воената помош за Киев да останат доверливи.
Официјалните соопштенија на италијанската влада во врска со помошта за Украина се фокусираат на материјалите за цивилна употреба, додека конкретниот список на воени испораки не се објавува јавно.
Ваквиот пристап има и политичка димензија. Во италијанската владејачка коалиција постојат различни ставови околу вооружувањето на Украина, а партијата „Лига“ повеќепати се спротивставувала на испраќањето оружје.
Прашањето станува дополнително чувствително и поради приближувањето на парламентарните избори, при што италијанската влада се обидува да избегне нови внатрешни политички тензии околу поддршката за Киев.
