Турција се подготвува за една од најрадикалните промени во својата модерна историја – целосно укинување на тутунската индустрија и остри ограничувања за пушење, со цел земјата да стане „без чад“ до 2040 година.
Децении наназад, Турција важеше за една од најтолерантните туристички дестинации за пушачи. Цигара на плажа, пушење на тераси од кафулиња и ресторани или по вечера се сметаа за дел од локалната култура и туристичкото искуство. Но, тоа наскоро може драстично да се промени.
Според новиот предлог-закон подготвен во координација со Министерството за здравство, се предвидуваат строги ограничувања за пушење на отворено. Забраната би ги опфатила терасите на ресторани и кафулиња, плажите, спортските објекти, парковите, верските објекти, како и образовните и здравствените институции.
Во угостителските објекти би можеле да постојат специјални зони за пушење, но со строги правила – без послужување храна и пијалоци во тие простори.
Дополнително, се воведува и построга контрола на продажбата на тутун. Сите трансакции би се вршеле електронски и би се следеле преку национален систем, а производите би морале да бидат скриени од очите на купувачите. Проверка на возраст би била задолжителна при секоја продажба.
Најрадикалниот дел од планот е долгорочната цел: од 1 јануари 2040 година, целосна забрана за производство, увоз, продажба и дистрибуција на сите тутунски производи во земјата. Тоа не би ги опфатило само класичните цигари, туку и електронски цигари, уреди за греење тутун, наргиле и сите никотински производи.
Казните за прекршување се предвидени да бидат високи – од десетици илјади до стотици илјади евра за поединци, додека компаниите би се соочувале со милионски казни. Во одредени случаи, особено при продажба на малолетници, се предвидува и затворска казна.
Овој чекор доаѓа во земја каде што повеќе од една четвртина од возрасните сè уште пушат, и каде тутунот има силно културно и економско значење. Турција е и една од историски важните производители на тутун во регионот.
И покрај тоа, земјата веќе со години води строга анти-тутунска политика. Од 2009 година се воведени забрани за пушење во затворени простори, како и ограничувања за рекламирање, поради што беше меѓународно пофалена од Светската здравствена организација.
Доколку новиот закон биде усвоен, туристичкото искуство во популарни дестинации како Анталија, Бодрум и Мармарис значително ќе се промени. Пушењето на плажи, во барови и на хотелски тераси би станало минато.
Иако законот сè уште е во фаза на предлог и може да претрпи измени, насоката е јасна – Турција постепено се движи кон целосно општество без чад, што ќе има големо влијание и врз туристите и врз локалното население.
