Европа и Балканот се соочуваат со исклучително висок ризик од пожари во третата недела од август, покажуваат податоците од Европскиот информативен систем за шумски пожари (EFFIS).
Според податоците објавени на 17 август, од почетокот на 2026 година на територијата на Европската Унија изгореле 576.027 хектари земјиште.
Иако ова е помалку во споредба со рекордната 2025 година, кога до средината на август биле опожарени повеќе од 713.000 хектари, годинашната бројка е повеќе од двојно повисока од повеќегодишниот просек за периодот 2006–2025, кој изнесува околу 243.000 хектари.
Екстремна опасност и на Балканот
Најновите мапи за опасност од пожари за периодот од 13 до 19 август покажуваат особено сериозна состојба во голем дел од Европа.
Зоните со највисоко ниво на опасност се протегаат низ делови од Централна и Источна Европа, а меѓу загрозените подрачја е и Балканскиот Полуостров.
Висок и екстремен ризик е присутен и на Иберискиот Полуостров, во делови од Франција, Велика Британија, Ирска и јужна Шведска.
Временските услови дополнително ја усложнуваат ситуацијата. За периодот од 17 до 23 август се очекуваат температури над просекот во Португалија, западна Шпанија, Франција и на Балканот.
Иако за делови од алпскиот регион, Италија и западниот Балкан се прогнозираат врнежи над просекот, претходните топлотни бранови и сушните периоди придонесуваат опасноста од пожари да остане висока.
EFFIS ги следи пожарите и изгорените површини со помош на сателитски снимки, меѓу кои податоци од Sentinel-2, MODIS и VIIRS. Информациите се ажурираат повеќепати во текот на денот, што им овозможува на надлежните служби да ја следат состојбата и ширењето на пожарите.
