Американскиот претседател Доналд Трамп најави дека очекува значително намалување на цените на нафтата и горивата по завршувањето на војната со Иран, тврдејќи дека падот ќе биде брз.
Во објава на социјалната мрежа Truth Social, Трамп порача дека цените ќе почнат нагло да се намалуваат откако САД, како што рече, ќе ја „добијат војната со Иран“.
„Цените на нафтата драстично ќе паднат, како и сè друго, кога ќе ја добиеме војната со Иран. Три долари за галон, а на крајот под два долари за галон. Сè ќе се случи брзо, а Иран никогаш нема да има нуклеарно оружје“, напиша Трамп.
Неговата изјава доаѓа во период на силни турбуленции на светскиот енергетски пазар, предизвикани од конфликтот со Иран и нарушувањата околу Ормускиот Теснец. Дополнителен притисок врз пазарот создадоа и најновите напади на Хутите врз енергетски објекти во Саудиска Арабија.
Во САД, националниот просек на цената на бензинот во моментов е околу 4,15 долари за галон, што значи дека прогнозата на Трамп за цена под два долари би претставувала пад од повеќе од 50 проценти. Трамп, сепак, не прецизираше рок во кој очекува цените да се спуштат на тоа ниво.
Во меѓувреме, цената на брент нафтата се движи близу границата од 100 долари за барел, додека геополитичките ризици на Блискиот Исток продолжуваат да создаваат неизвесност на светските пазари.
