Јужнокорејски научници развија иновативна технологија за „паметна облека“ која може речиси самостојно да се облече, без корисникот да мора да ги користи рацете.
Системот е инспириран од начинот на кој растенијата ползавци се движат и се приспособуваат на површината околу нив. Основата на технологијата потекнува од роботската „лоза“ SWAG, развиена од професорката Алисон Окамура од Универзитетот Стенфорд.
Роботот се движи по телото на корисникот и постепено ја повлекува и превиткува ткаенината, овозможувајќи облеката да се намести на телото без класично облекување со раце.
Идејата за ваквата примена ја развил истражувачот Ким Нам-гјун. Тој за Ројтерс објаснил дека инспирацијата ја добил додека возел велосипед и ненадејно го фатил дожд. Тогаш помислил колку би било практично мантилот сам да може да се облече додека човекот е во движење.
Брзината на целиот процес зависи од воздушниот притисок во системот, а според досегашните тестирања, облекувањето може да трае до десет секунди.
Научниците веќе изработиле повеќе прототипови, меѓу кои ракави, панталони, но и облека што го покрива целото тело.
Една од најзначајните потенцијални примени на технологијата е кај лицата со намалена подвижност, на кои секојдневното облекување може да им претставува сериозен предизвик. Во иднина ваквите системи би можеле да им овозможат поголема самостојност.
Технологијата сè уште е во развој, а роботските компоненти засега се видливи под облеката. Сепак, досегашните прототипови покажуваат како решенијата од роботиката можат да преминат од лабораториите директно во секојдневниот живот.
Видео:
