Претседателот на Украина, Володимир Зеленски, изјави денеска дека повеќе од 500 припадници на Државната служба за вонредни состојби биле вклучени во справувањето со последиците од рускиот напад изведен во текот на ноќта врз украинските градови и заедници.
Зеленски: 500 луѓе се бореа со последиците од нападот
– Главниот удар беше врз Киев, каде што повторно се оштетени десетици станбени згради и друга чисто цивилна инфраструктура. За жал, пријавено е дека четири лица загинаа. Мое сочувство до сите нивни семејства и најблиски – рече Зеленски во објава на социјалната мрежа Икс.
Како што наведе тој, во моментов 38 лица се наоѓаат во болниците во главниот град на Украина и сите тие ја примаат неопходната нега.
– Во Дњепар во тек е операција за потрага и спасување на местото на четирикатна станбена зграда. Дел од зградата е практично срушен. Девет лица загинаа во овој напад, вклучувајќи и едно дете. Триесет и пет лица се повредени во градот – додаде претседателот на Украина.
Зеленски наведе и дека судбината на уште шест лица останува непозната и дека потрагата по нив ќе продолжи колку што ќе биде потребно.
– Русите, исто така, погодија енергетски постројки во Харковската област и критична инфраструктура во Харков. Киевската, Николаевската, Запорошката, Полтавската, Сумската, Черниговската и Хмелничката област исто така беа нападнати – истакна тој.
Според неговите зборови, Русија во текот на ноќта лансирала вкупно 656 дронови и 73 ракети од различни типови врз украинскиот народ, односно балистички, крстосувачки и противбродски ракети.
– Напад од големи размери и апсолутно јасна порака од Русија – ако Украина не биде заштитена од балистички и други ракетни удари, овие напади ќе продолжат – рече Зеленски.
Како што вели тој, на Европа ѝ е потребна сопствена антибалистичка одбрана за конечно да се стави крај на оваа војна, а помошта од Соединетите Американски Држави во испораката на ракети за системите „Патриот“ е апсолутно неопходна.
– Сметаме на поддршката од нашите партнери и на ефикасни одговори на денешниот напад. И им благодарам на сите украински мажи и жени што не ги игнорираа предупредувањата за воздушен напад – заклучи Зеленски.
Сцени на разурнување во Киев
Русија синоќа покрена еден од најголемите воздушни напади, таргетирајќи разни украински градови, вклучувајќи го и Киев, со ракети и дронови. Ширум земјата загинаа најмалку 13 луѓе, а повеќе од 100 се повредени, соопштија официјалните лица.
Во киевскиот округ Подилски, деветкатна станбена зграда од советската ера беше оштетена, како што изјавија жителите, од експлозивен бран од ракетни кршоци кои паднале во близина.
– Што да кажам? Путин е кретен – изјави 65-годишниот Јевген Дњепровски за „Киев Индепендент“, додека лицето му беше крваво од повреди од шрапнели. Тој бил во својот стан со сопругата за време на нападот. Таа е повредена и пренесена во болница.
Општинските работници веќе ги поправаа електричните кабли на зградата. Поголемиот дел од прозорците на едната страна од блокот беа скршени, а неколку балкони целосно исчезнаа.
– Во шок сум. Сè се случи многу брзо. Истрчав од станот. На вториот кат една жена не можеше да излезе од својот стан, а јас не можев да ја отворам вратата. А таму имаше и еден млад човек, момче на околу 20 години, ногата му беше силно пресечена, имаше многу крв. Го држев, го преврзавме таму горе и повикавме Брза помош – раскажа еден жител на Киев за „Киев Индепендент“.
