Продолжувањето на американските воени операции против Иран создава сè поголем притисок врз вооружените сили на САД и може да ја намали нивната способност да одговорат на потенцијални кризи во други делови од светот, се наведува во доверлива воена проценка пренесена од американски медиуми.
Според информациите, повеќе високи американски воени претставници го предупредиле секретарот за одбрана Пит Хегсет дека операцијата, која трае веќе шест месеци, сериозно ги оптоварува расположливите ресурси.
Во проценката наводно учествувале претставници на копнената војска, морнарицата и воздухопловните сили, како и командите задолжени за Европа, Азија и Латинска Америка.
Главната загриженост е што бродови, авиони, системи за противвоздушна одбрана и друга воена опрема се пренасочуваат кон Блискиот Исток, оставајќи помалку ресурси за другите американски команди.
Според лица запознаени со документот од 14 август, дел од американските сили треба да останат во регионот до септември, додека одредени единици би можеле да бидат ангажирани и во текот на 2027 година.
Најголем притисок врз морнарицата
Особено загрижувачка, според проценката, е состојбата во американската морнарица. Во документот наводно се наведува дека сегашното ниво на ангажман тешко може да се одржува долгорочно без јасен рок за завршување на операциите.
Само нешто повеќе од една четвртина од американската флота на разурнувачи, според објавените информации, моментално е подготвена за ново распоредување, што претставува значителен пад во однос на периодот пред почетокот на војната.
Продолжен е и ангажманот на делови од 82. воздухопловно-десантна дивизија и единиците задолжени за системите „Патриот“.
Истовремено, воените операции влијаеле и врз залихите на ракети за „Патриот“, пресретнувачите за системот THAAD и крстосувачките ракети „Томахавк“.
Од Пентагон, сепак, посочуваат дека одлуките за обемот и времетраењето на американскиот воен ангажман се носат врз основа на актуелните закани, приоритетите на претседателот и проценките на военото раководство.
Портпаролот на Хегсет, Шон Парнел, нагласил дека токму овие фактори ќе продолжат да бидат основа за одлуките за идното распоредување на американските сили.
