Доналд Трамп има посебно место на кое очигледно се чувствува како дома – сопствените голф-клубови. А ново истражување на „Форбс“ открива необични детали од неговите викенди: од омилените хот-дог сендвичи кај 11-тата дупка, до сметките што неговиот клуб ги испраќа до американската Тајна служба.
Еден од најнеобичните детали доаѓа од „Trump National Golf Club“ во близина на Вашингтон.
Според поранешен вработен во клубот, Трамп е исклучително горд на хот-дог сендвичите што се служат кај 11-тата дупка и често инсистира да им бидат поделени на сите околу него – вклучително и на агентите на Тајната служба.
Но тие сендвичи не се подарок.
Поради етичките правила што го ограничуваат прифаќањето подароци од лицата кои агентите ги штитат, клубот отворил посебна сметка за Тајната служба и потоа ѝ ги фактурирал производите што ги добивале агентите.
Така се создава необична ситуација: претседателот е сопственик на клубот, неговиот персонал ги служи агентите кои го обезбедуваат, а сметката потоа завршува кај федералната агенција.
1.400 часа на сопствените голф-имоти
Уште повпечатливи се бројките за времето што американскиот претседател го поминува на своите голф-имоти.
Според анализата на „Форбс“, од враќањето во Белата куќа Трамп посетил еден од своите голф-терени во околу 165 од приближно 600 дена од вториот мандат.
Вкупното време поминато на тие имоти надминало 1.400 часа.
Тоа, сепак, не значи дека сите 1.400 часа ги поминал со палка во рака. Од Белата куќа нагласуваат дека Трамп таму одржува и состаноци, ручеци и донаторски настани и дека посетата на голф-клуб не значи автоматски дека целиот ден бил посветен на голф.
Свет во кој сè е подредено според неговиот ритам
Луѓето кои играле со Трамп го опишуваат неговиот стил како исклучително брз.
Тој сака прв да удира, веднаш да продолжува кон следната топка и целата рунда да ја заврши за околу два и пол часа.
На неговите терени важи и неформално правило – кога се појавува претседателската група, другите играчи се тргаат настрана за да ѝ овозможат непречено движење.
Во клубовите, според сведоштвата што ги собрал „Форбс“, Трамп внимавал и на најмалите детали: од начинот на кој е искосена тревата до позицијата на дрвјата и погледот кон теренот.
Три јајца, три парчиња сланина – па голф
И неговата рутина пред играта наводно е прилично постојана.
Луѓе кои играле со него велат дека за појадок најчесто избира три добро испржени јајца и три парчиња сланина.
Потоа следува брза рунда голф, а околу 11-тата дупка доаѓа моментот резервиран за неговите омилени хот-дог сендвичи.
Поранешни вработени тврдат дека понекогаш се подготвувале и десетици сендвичи за пошироката придружба.
Трамп тврди дека е шампион – критичарите го обвинуваат дека има „свои правила“
Претседателот со години јавно се гордее со својата игра и со десетиците клупски шампионски титули што вели дека ги освоил.
Но неговиот однос кон правилата на голфот одамна е тема на расправа.
Спортскиот новинар Рик Рајли дури напиша книга за неговата игра со наслов „Commander in Cheat“, во која го обвинува Трамп дека премногу слободно ги толкува правилата.
Белата куќа ги отфрла ваквите обвинувања и тврди дека претседателот е исклучително успешен голфер и дека не манипулира со резултатите.
Кога претседателот доаѓа, клубот се менува
Посетата на Трамп на неговите клубови значи и целосна безбедносна операција.
Десетици агенти на Тајната служба го следат низ теренот, а медиумите што вообичаено го придружуваат претседателот имаат ограничен увид во она што се случува додека тој е на теренот.
Голф-клубот така станува необичен простор во кој се спојуваат три улоги на Трамп – претседател на САД, сопственик на приватен бизнис и страстен голфер.
А можеби најдобар симбол на целиот тој свет е токму хот-дог сендвичот кај 11-тата дупка: Трамп го препорачува, неговиот клуб го подготвува, Тајната служба го јаде – а федералната агенција ја добива сметката.
