Птичјиот грип повторно брзо се шири низ Германија, а научниците предупредуваат дека актуелниот сој H5N1 има потенцијал да предизвика глобална пандемија доколку мутира и почне да се пренесува меѓу луѓето.
Според Институтот Фридрих Лефлер, од почетокот на септември се регистрирани повеќе од 30 жаришта на вирусот во живинарските фарми и над 130 случаи кај диви птици. Само во последните недели, повеќе од половина милион кокошки, патки, гуски и мисирки морале да бидат уништени за да се спречи понатамошното ширење.
Особено е погоден источниот дел на Германија и Долна Саксонија, каде заразата се шири со невообичаена брзина. Институтот ја оцени ситуацијата како „висок ризик“, предупредувајќи дека миграторните птици би можеле дополнително да го влошат ширењето на вирусот во наредните недели.
Познатиот вирусолог Клаус Штёр, поранешен раководител на Програмата за грип на СЗО, изјави дека вирусот H5N1 „има сè што му е потребно за да предизвика пандемија“, но засега ризикот за луѓето е многу низок. Тој апелира на претпазливост и советува граѓаните да не ги допираат мртвите птици и да го известат локалното ветеринарно одделение.
Претседателот на Германската асоцијација за живинарска индустрија, Ханс-Петер Голдник, предупреди дека земјата се наоѓа во рана, но интензивна фаза на епидемијата, особено во фармите со слободен одглед, со можни прекини во снабдувањето со јајца и живинарско месо.
Германското Министерство за земјоделство најави дека ќе побара од ЕУ зголемување на лимитот за компензација на земјоделците од 50 на 110 евра по животно.
Постојаниот комитет за имунизација препорачува вакцинација против сезонски грип за сите кои имаат контакт со живина или диви птици, со цел да се избегне двојна инфекција што би можела да доведе до создавање на нов, потенцијално опасен вирус.
Како што заклучува Штёр: „Пандемиите не можат целосно да се спречат, но со добра подготовка, рана контрола и глобална соработка можеме да ја намалиме нивната сила. Време е да се подготвиме – не да чекаме.“
