Украинскиот претседател Володимир Зеленски изјави дека состојбата на фронтот е сложена и сè потешка, предупредувајќи дека Русија постојано го зголемува бројот на свои воени сили на бојното поле.
Говорејќи за неодамнешната посета на Купјанск, град кој претставува една од стратешките цели на руската армија, Зеленски истакна дека линијата на фронтот била опасно блиску.
„Русите се сè побројни и ситуацијата станува потешка. Кога пристигнав во Купјанск, состојбата беше навистина тешка – фронтот беше многу блиску. Сепак, нашите вооружени сили го држат градот под контрола“, изјави украинскиот претседател.
Тој призна дека руските сили вршат силен притисок и дека во некои случаи успеваат да навлезат во населени места.
„Тие можат да уништат едно село, па друго. Можат и да влезат. Но ние ќе направиме сè за да ги спасиме животите на нашите војници, затоа што најважно е да ја зачуваме армијата. Тоа не значи дека сме подготвени да се предадеме“, нагласи Зеленски.
Претседателот исто така укажа на сериозни предизвици со снабдувањето, особено кога станува збор за ракети за воздушна одбрана.
„Имаме недостиг од одредени типови ракети, пред сè за воздушна одбрана, од различни причини – меѓу кои и доцнења во испораките“, рече Зеленски.
Посетата на правецот Купјанск, која се случила на 12 септември, доаѓа во момент кога борбите на истокот на Украина повторно се интензивираат, а Русија настојува да ја прошири контролата врз клучни позиции.
