Руското Министерство за надворешни работи соопшти дека го поздравува назначувањето на Делси Родригез за привремен претседател на Венецуела, нагласувајќи дека иднината на земјата мора да биде одредена исклучиво од нејзините граѓани, без каков било надворешен притисок или мешање.
Од Москва порачаа дека најважен приоритет во актуелната ситуација е спречување на натамошна ескалација и зачувување на стабилноста, додека сите несогласувања треба да се решаваат преку дијалог и дипломатски канали.
Во меѓувреме, поранешниот венецуелски претседател Николас Мадуро вчера во Њујорк се изјасни за невин по сериозните обвиненија за трговија со дрога, откако беше приведен во операција спроведена од американските специјални сили. Овој настан силно ја потресе политичката сцена во Каракас, каде што клучните политички актери брзо се прегрупираат во обид да ја консолидираат власта.
Руското МНР истакна дека ги поддржува напорите на венецуелските институции за заштита на државниот суверенитет и националните интереси, додавајќи дека обидите за наметнување решенија однадвор се неприфатливи и можат дополнително да ја дестабилизираат земјата и регионот.
Москва остро ја осуди и американската акција против Венецуела, оценувајќи дека оправдувањата за интервенцијата се неосновани. Русија застана зад повиците на Венецуела и неколку латиноамерикански земји за итен состанок на Советот за безбедност на Обединетите нации, со цел разгледување на ситуацијата и спречување понатамошни тензии.
„Во вакви околности, од клучно значење е да се избегне секоја дополнителна ескалација и да се насочиме кон пронаоѓање излез преку разговор и меѓусебно разбирање“, соопштија од руското МНР.
Заменик-претседателот на рускиот Совет за национална безбедност, Дмитриј Медведев, изјави дека Латинска Америка традиционално се третира како „двор“ на САД и оцени дека американскиот претседател Доналд Трамп има јасна намера да воспостави контрола врз богатите нафтени ресурси на Венецуела. Медведев ги нарече постапките на Вашингтон нелегални и спротивни на меѓународното право.
