Германската полиција уапси 48-годишен маж осомничен дека стои зад серија напади врз трафостаници и друга електроенергетска инфраструктура во повеќе делови од земјата.
Даниел В. бил уапсен во близина на Вајсвајлер, во сојузната покраина Северна Рајна-Вестфалија, по повеќедневна и обемна полициска потрага.
Според информациите на „Шпигел“, осомничениот бил сам и се движел пеш кога се обидел да помине покрај полициска блокада. Полицајците го запреле и го привеле, а при апсењето тој не давал отпор.
Случајот дополнително го привлекол вниманието откако кај него биле пронајдени и дополнителни експлозивни средства.
Во близина на местото каде што бил уапсен, полицијата пронашла и шатор поставен во грмушки, во кој исто така имало експлозивни средства. Пронајдените предмети ги прегледуваат специјалисти за деактивирање експлозиви од покраинската криминалистичка служба.
Само еден ден претходно, во близина на електраната во Вајсвајлер биле пронајдени неколку направи за кои истражителите се сомневаат дека биле користени при нападите врз трафостаници.
Кај една од направите било откриено и ново писмо во кое, според германските медиуми, осомничениот ја презел одговорноста за нападите.
Истражителите го поврзуваат 48-годишникот со повеќе инциденти насочени кон електроенергетската инфраструктура во Бранденбург, Саксонија и Северна Рајна-Вестфалија.
Во еден од случаите, во близина на електраната Јеншвалде во јужен Бранденбург, биле употребени импровизирани летачки направи слични на ракети за огномет, со кои проводлив материјал бил насочуван кон високонапонски водови.
Полицијата досега пронашла повеќе од десет вакви направи. Според операторот на мрежата, во конкретниот случај не дошло до прекин на снабдувањето со електрична енергија.
Само неколку часа подоцна бил регистриран дефект и во трафостаница во Бергхајм, во близина на Келн, каде повторно биле откриени направи за лансирање и пиротехнички средства.
Според истрагата, Даниел В. во повеќе писма испратени до надлежните институции ја преземал одговорноста за нападите.
По него била организирана потрага на европско ниво во која биле вклучени голем број полицајци, дронови, хеликоптери и термовизиски камери.
Осомничениот, кој потекнува од Гевелсберг во Северна Рајна-Вестфалија, сега се наоѓа во притвор. Против него била издадена потерница по налог на обвинителството во Котбус.
Германските медиуми наведуваат и необични детали од неговото минато. Даниел В. наводно студирал медицина, а подоцна се занимавал со изработка на гитари.
Околу својата 40-та година почнал самостојно да произведува гитари, а американски школски автобус го преуредил во мобилна работилница со која патувал низ Германија и Европа. Во последните години, според медиумите, бил невработен.
Како можен мотив во писмата го наведувал своето противење на производството на енергија од фосилни горива. Наводно тврдел и дека дејствувал сам, со цел одговорноста за нападите да не биде префрлена врз левичарски групи.
Истрагата продолжува, а германските власти треба да утврдат со колку напади е поврзан осомничениот и какви средства биле користени во секој од нив.
