Силна експлозија на цистерна ја потресе општината Тепеака во Мексико, откако возило за кое постои сомнеж дека превезувало нелегално гориво експлодирало во населбата Сан Хуан Негрете.
Инцидентот се случил вчера околу 10 часот наутро, а силната детонација ги вознемирила жителите, при што се почувствувала во повеќе делови од општината. Неколку минути по експлозијата, над местото се издигнал густ и црн столб чад кој бил видлив од голема далечина и предизвикал паника во околината.
Веднаш по пријавата, на терен биле испратени екипи на цивилната заштита, пожарникари, општинската полиција и други служби за итна интервенција. Властите воспоставиле безбедносен периметар и целосно го блокирале пристапот до погоденото подрачје за да се спречи дополнителна опасност за граѓаните.
Како превентивна мерка, спасувачките служби започнале итна евакуација на семејствата кои живеат во непосредна близина на местото на несреќата, поради страв од можни секундарни експлозии или понатамошно ширење на пожарот.
Во гаснењето на огнената стихија биле вклучени и пожарникари од соседните општини, кои пристигнале со дополнителни цистерни со вода со цел побрзо да се стави ситуацијата под контрола.
До моментот на објавување на информациите, властите сè уште не потврдиле дали има повредени или загинати лица, а не се објавени ниту официјални детали за точната причина за експлозијата.
Првичните информации укажуваат дека цистерната можеби транспортирала украдено гориво, познато во Мексико како „huachicol“, но оваа верзија сè уште не е официјално потврдена и е предмет на истрага.
Подрачјето останува под целосна блокада и надзор на безбедносните служби, додека продолжуваат активностите за ладење на теренот, проценка на штетата и утврдување на сите околности поврзани со експлозијата.
